Levar
os gatos ao veterinario é algo que debe facerse con especial
delicadeza, para que non se convirta nun trance difícil para todos
(gatos, donos e veterinarios). Por esto facilitamos estas
orientacións sobre como facelo de xeito que lles resulte o menos
estresante posible.
O
ideal é que os gatiños visiten o veterinario por vez
primeira cando son inda noviños, e que esta visita non
implique brusquedades nin accións que poidan resultar dorosas. Se é
así, probablemente o gato se comporte dunha maneira comedida nas
sucesivas visitas.
Se
a primeira visita é xa de grande e, sobre todo, se non está
afeito ao contacto con descoñecidos (en particular, a que o
collan), é probable que se sinta abraiado e acurralado nun entorno
descoñecido, e que reaccione en consecuencia, con intentos de fuga,
bufidos, rabuñazos ... Para evitar que esto suceda, debemos seguir
toda unha estratexia para intentar convertir a visita ao
veterinario en algo que lle resulte tolerable. Recomendamos seguir
estas pautas:
1-
Tódolos gatos deben levarse nunha caixa de transporte. O
risco de fuga se o levamos no colo, por confiado que sexa
normalmente, é claro.
O
gato debe asociar esta caixa cun refuxio onde se sinta cómodo e
protexido. Se só a usamos para levalo ao veterinario, non lle
resultará precisamente un sitio simpático. O ideal é que forme
parte do seu entorno desde sempre, e que o use como un dos seus
lugares de descanso. Sendo así, non debe ser complicado conseguir
que entre. En caso contrario...
2-Aos desprazamentos tamén debemos habitualos, a ser posible desde pequeniños. Lembrar que, fóra do seu terreo, a maioría dos gatos pasan medo cando se lles aproximan persoas descoñecidas ou animais. Tapar a caixa cunha toalla (ou funda a propósito) e levala nunha posición alta poden ser medidas que lles axuden. Tamén debemos evitar estímulos alarmantes, especialmente ruídos altos ou estridentes.
Se levamos ao noso micho no coche de vez en cando, simplemente dando un paseo, irá afacéndose á experiencia e tamén se evitará que lle xere medo e mareo. A este respecto, convén nas primeiras ocasións retirarlle a comida -non a auga-cunha antelación de 6 horas. Dentro do auto, a caixa debe ir nun lugar estable.
O uso dun pulverizador de feromonas (Feliway) tanto no transportin-dúas pulverizacións no teito e dúas na base, dirixidas ás esquinas- coma no auto (esperando a que se evapore o excipiente alcoólico antes de introducir o micho)- pode ser unha axuda importante para que o feito de metelo na caixa e levalo nun coche non o amedrente.
3-Xa na visita veterinaria, na saliña de espera, polos mesmos motivos, debemos evitar que poidan achegarse a el descoñecidos (persoas ou animais, sobre todo cans). O ideal é esperar nun entorno tranquilo e a ser posible colocalo nunha plataforma sobreelevada, coma a que temos na sala de espera de Veterinario de Poio, pois nun plano superior vaise sentir moito menos vulnerable. Lembrar que tamén podemos cubrir a súa caixa cunha toalla ou funda.
4-
Unha vez na consulta, os propietarios deben manterse
tranquilos, porque así transmitirán tranquilidade ao seu
animal. Normalmente será axeitado que colaboren no manexo, seguindo
as indicacións do veterinario. Quedar en mans dun descoñecido
vaille ser máis intimidante que se o seu dono tamén participa na
súa manipulación. Debemos intentar que saia da caixa por propia
iniciativa, e se non é así desmontar o transportín. O importante é conseguir que non se
atemorice, porque nese caso o veterinario terá que recorrer a
métodos como cubrilo cunha toalla e/ou practicar suxeccións
estresantes ou incluso administrarlle sedantes. Claro que cando se
chegan a usar estas técnicas "represivas", podemos dar por
descontado que a seguinte visita tampouco vai ser moi amigable. Por
eso, convén familiarizar con suavidade a tódolos gatos, a ser
posible de gatiños, coas súas visitas médicas. Polo seu propio
beneficio.
Unha
derradeira indicación: se o gatiño pasou medo, a súa caixa de transporte quedará impregnada de
feromonas de alarma. Tras o seu uso, convirá lavala e, se queda de
novo no entorno do gato, é oportuno pulverizala outravolta con
feromonas faciais.
Ningún comentario:
Publicar un comentario