Porque son moitas
as mascotas que experimentan unha diminución da súa función renal na segunda
metade da súa vida. Como consecuencia, perden
capacidade de eliminar toxinas e incluso de compensar axeitadamente a
cantidade de minerais e de líquido no seu corpo.
As
causas poden ser moitas, pero podemos destacar o papel dun
corazón que xa non bombee de xeito competente, o dunha nutrición
inadecuada ao longo do tempo ou o dalgunhas infeccións que poden incluso pasar desapercibidas ou estar curadas
hai tempo (teñen especial importancia a este respecto aquelas causadas por protozoos,
coma a ehrlichiose, a leishmaniose, a piroplasmose...).
É
por esto recomendable chequear a
función renal de maneira preventiva.
Podemos empezar cando nos acercamos á madurez, pero conseguiremos un
mellor coñecemento e control da saúde renal da nosa mascota facendo controles
regularmente desde nova.
Dentro
dos parámetros que podemos valorar para coñecer o estado de
saúde dos riles o considerado máis importante é a valoración do nivel de
creatinina no soro sanguíneo. Aínda que existen marcadores máis sensibles de dano renal, en Veterinario de Poio entendemos que, como norma xeral, mentres os valores de creatinina permanezan baixos, podemos estar razoablemente tranquilos. Se o nivel é dubidoso ou directamente elevado recomendaremos investigar máis.
A outra primeira proba de chequeo que recomendamos é comprobar o nivel de proteínas nos ouriños. Moitos dos problemas renais significativos causan que se perdan
proteínas nos pises (cousa que pode chegar a ser debilitante). Se aparecesen, toca avaliar
o cociente proteína/creatinina. Se é baixo, tranquilos polo momento; se é intermedio (0,2-0,4), vixiantes;
máis de 0,4 implica unha proteinuria con significado patolóxico, e
deberiamos facer unha avaliación analítica completa e deseñar unha
estratexia para intentar que eses riles renqueneantes sigan sendo
quen de cumprir a súa importante misión, alongando así o tempo en
que a nosa mascota poida desfrutar dunha vida en plenitude.
No
caso dos gatos maiores, chegados aquí faise obrigado
controlarlles a tensión. A hipertensión non controlada é unha silandeira fonte de problemas, e unha alta proporción dos gatos con doenza renal crónica
son hipertensos. Publícase que ata o 35% dos gatos xerontes teñen doenza renal
crónica.
En moitos casos insuficientemente controlados sucede retención de fósforo, algo que causa unha alteración dos niveis de calcio que provoca o
hiperparatiroidismo secundario. Isto pode levar a outras complicacións indesexables, tales coma a calcificación renal ou a osteodistrofia...
Así as cousas, se
confirmamos efectivamente que nolas vemos cunha doenza renal
crónica, recomendaremos facer un
seguimento particularizado de cada
caso. Non temos que esperar recobrar a plena funcionalidade, pero
normalmente poderemos retardar a aparición de complicacións e dos signos clínicos.
Estes
son os principais instrumentos de control dos cales dispomos:
1-
dieta que xere o mínimo esforzo renal (restrinxida en
proteína, sodio e fósforo; enriquecida con acedos graxos omega-3,
fibra e vitamina D...). É preferible facer un cambio gradual. Debemos
controlar ademais que o estado nutricional se mantén.
2-
correxir as descompensacións: pode ser necesario administrar quelantes
do fósforo (se o valor deste elemento se eleva en exceso); sales
de potasio (se o valor deste elemento descende en exceso); fluidoterapia en caso de deshidratación...
3- e en
caso de proteinuria ou hipertensión, prescribir a medicación adecuada para o seu control.
Ningún comentario:
Publicar un comentario